Le blog de Erik Enfors in interlingua

08.09.2010
A basso tu pote audir iste lectura in le mesme tempore como tu lo lege!In 1952, quando io habeva dece-quatro annos, io e un camerada de schola recipeva billetas de nostre parentes pro un viage con autobus a Halden in Norvegia, circa 160 km distante ab nostre urbe Vänersborg in Svedia. In ille tempore il esseva popular comprar margarina e certe altere productos alimentari in Norvegia ubi le precios sovente esseva plus basse, specialmente del margarina. A causa de isto multe companias de autobus arrangiava viages a Norvegia. Io crede que nos esseva le plus juvene personas in le autobus e nos certo non esseva interessate de compras, ma lo que nos interessava esseva un altere scopo del viage, a saper un visita al fortalessa Fredriksten presso Halden ubi le rege svedese Karl XII esseva occidite in le anno 1718. Con grande interesse nos ascoltava le historia re iste evento historic e le guida tamben demonstrava exactemente ubi le rege habeva essite quando ille esseva fusilate. Multe historicos crede que isto forsan non esseva un colpo de foco causal ma plus probabile un homocidio committite per un svedese qui odiava le guerras continue initiate per iste rege. Quando nos retornava al centro de Halden le plus viagiatores comenciava facer lor compras in le urbe ma io e mi camerada remaneva sur le placia ubi le autobus esseva parcate. Nos besoniava alque a mangiar e vadeva a un kiosque ubi nos videva altere personas mangiar salcicias con pan e nos comprava cata uno le sue. Ma que poterea juvene pueros biber in iste urbe estranier. Quando nos demandava le venditor ille tosto demonstrava duo botilias con un forma extrememente estranie, que nos nunquam habeva vidite, continente un fluido brun, e ille nos convinceva comprar los. Nos esseva multo suspiciose ma lo faceva e vadeva al autobus con le botilias e le salcicias. Alora nos discoperiva sur le kiosque un texto multo alarmante: “Pölser” (=salcicias in norvegiano). Ma nos credeva que ille parola deberea significar le mesmo como “pilsner” (=birra in svedese). Nos nunquam habeva bibite birra e quando nos probava ille fluido brun nos lo trovava detestabile e tosto nos esseva convincite que illo certo debeva esser un forma de birra o forsan alque plus forte. Reconsiderante que nos forsan devenirea inebrietate o mesmo debeva vomitar durante le viage retro a Svedia nos non osava biber le bibita. Que facer? Nos aperiva le fenstra in le autobus e versava le fluido al guttiero quando nos esseva secur que necuno lo videva.Isto esseva mi prime experientia con Coca-Cola. Iste bibita esseva introducite in Svedia solmente le anno sequente, 1953. Quando io ha contate iste historia a mi infantes e graninfantes illes ha ridite multo a causa de mi ignorantia incredibile.Ascolta iste historia hic! Get this widget | Track details | eSnips Social DNA

Le blog de Erik Enfors in interlingua

06.09.2010
Le participantes del cursos intensive ante le incontro.Detra le camera Inger Olsson.Clicca duo vices pro aggrandir le photo!2010_07_29Clicca sur le photo in supra pro vider plus photos!(illos essera plus grande si on clicca sur illos)Durante le 28 de julio - 1 de augusto 39 personas se incontrava in le collegio pro adultos de Högalid, Kalmar, pro perfectionar lor cognoscentias de interlingua e participar in le 12e Incontro Nordic.CursosDuo cursos intensive initiava le incontro, uno pro comenciantes dirigite per Martijn Dekker, Nederland, e uno pro avantiatos dirigite per Bengt Enqvist. Ingvar Stenström, qui omne previe vices ha dirigite le curso pro comenciantes non poteva acceptar iste carga a causa de su sanitate ma ille tamen participava durante tote le tempore.Incontro NordicLe Incontro Nordic comenciava postmeridie le 30 de julio e post apertura official e benvenitas le labor comenciava. Thomas Breinstrup, le redactor de Panorama, dirigeva labor in gruppos con cargas differente:- Collaborar pro producer un libro in interlingua pro infantes- Controlo de nostre servicio in internet- Reclamo pro interlingua- Establimento de un archivo commun de materiales pro le inseniamento de interlinguaIste labor esseva reportate per le gruppos le proxime die.ExcursionesLe participantes del cursos jam le 29 de julio faceva un visita rapide in autos al insula longe Öland que es connectite con le contintente de Svedia con un 6 km longe ponte. Le natura ibi es satis special a causa del terra calcifere. Nos visitava le ruina del Castello de Borgholm.Le 31 de julio nos vadeva con autos a Kalmar, 8 km. In le Castello de Kalmar un guida contava re le historia interessante de Kalmar. Lege plus in http://ia.wikipedia.org/ wiki/Kalmar. Le guida esseva interpretate per Ingvar Stenström e Thomas Breinstrup. Isto esseva un multo bon execitio in interlingua proque le ascoltatores ipse poteva essayar traducer lo que le guida dice ante que le interprete comenciava.Post le visita in le castello nos comenciava un demonstration in le centro del urbe ubi Bengt Enqvist, le vice-presidente del Societate Svedese pro Interlingua (SSI), con su megaphono dispergeva nostre message durante que omne participantes distribueva imprimitos concernente interlingua. Multe personas los legeva con interesse.DiscursosIn le vespere le 30 de julio le autor de iste pagina pronunciava un discurso appellate "Imprimer su proprie libro in Lulu" e demonstrava isto, passo pro passo, con copias del schermo durante le processo in Lulu www.lulu.comIl es de facto multo facile producer su proprie libro, mesmo in un singule exemplar. Un libro in formato A5 con 150 paginas e contento blanc-nigre ma con colores sur copertura molle costa solmente 8 €. Le porto postal intra le UE es circa 6 €, summa 14 €.In le postmeridie le 31 de julio Ingvar Stenström, secretario del SSI pronunciava un discurso interessante, "Lo que nos deberea facer e lo que nos pote facer". Ille sublineava le necessitate pro interlinguistas esser plus visibile in le medios social como Facebook, ma non solmente in le paginas que se dirige a interlinguistas. Alteremente nos non disperge le cognoscentia de interlingua in le communitate.MinifestaIn le vespere nos habeva un minifesta traditional. Le cocina del schola habeva arrangiate un repasto extraordinari e postea nos conversava e cantava cantos con Nils Kangas al piano.A reviderLe incontro esseva claudite le 1 de augusto a 11 horas quando le reunion annual de SSI comenciava durante que le alteres preparava lor partitas e post le lunch a 12 horas nos diceva "a revider " post que Bengt Enqvist habeva regratiate le personal amabile del cocina e le arrangiatores local Lennart e Margareta Åberg qui vive in Kalmar.ResolutionDurante le incontro iste resolution esseva approbate e inviate a Nordiska rådet (Le consilio Nordic), le ministros nordic de education, e le portavoces de questiones scholar del partitos parlamentari e Skolverket (Le autoritate administrative del scholas) .Plure de illes immediatemente respondeva e promitteva considerar le proposition.Ecce le resolution:"Introduce interlingua in le scholas nordicResolution: Le comprension lingual nordic e international del scholares debe esser fortificate.Omne scholares in le nordic scholas primari non solmente debe poter comprender le linguas del alteres. Illes anque debe haber un fundamento plus solide pro apprender linguas estranier e maestrar le parolas estranier in lor proprie lingua. Pro isto interlingua debe apparer in le horario ja in le scholas primari.Le 12nde incontro nordic de interlingua in Kalmar que assembla participantes de novem paises in e extra le paises nordic, sollicita le ministros nordic pro education, le portavoces politic pro education e le Consilio Nordic a fortificar le cognoscentias lingual in le scholas primari per introducer obligatori comprension lingual e usar le international lingua auxiliar interlingua, que in 2011 habera 60 annos, in le inseniamento. Isto da accesso rapide e effective al vocabulario international.Le juvenes in le paises nordic lo senti sempre plus difficile comprender le linguas del alteres. Pro isto le Consilio Nordic de Ministros in le autumno lancea un campania lingual. Al mesme tempore danese, norvegiano e svedese debe apparer sur le horario ja in le 1me classe, le Consilio Nordic de Ministros constatava a un conferentia in april 2010.Le plus tosto on ha le sentimento e gaudio pro linguas, le plus facile il es apprender e usar los.Le motto de interlingua es "communication sin frontieras". Ja in le 1960s on inseniava comprension lingual per interlingua in le danese scholas primari, e durante plus que 20 annos svedese alumnos gymnasial in le disciplina "Cognoscentia general de linguas" ha apprendite interlingua pro non solmente poter comprender le particulas latin e grec que es le clave al parolas estranier in svedese e un via rapide al studio de altere linguas, ma anque per interlingua ha potite usar lor saper activemente in le vita quotidian pro contactos e viages in le estraniero. Interlingua ha in ultra essite usate como lingua de summarios medical e scientific, pro summarios in libros, sur discos etc.Bon cognoscentias lingual es decisive pro poter communicar e obtener successo internationalmente. Pro isto le paises nordic debe ir in avante e assecurar que le scholares ja in le scholas primari ante toto comprende le linguas del alteres, pois ha le melior possibile puncto de partita pro le plus tosto possibile acquirer altere linguas. Isto eveni le plus rapide- e effectivementer per interlingua."

Le blog de Morten Svendsen

05.09.2010
Pluvia. Non solmente in Bergen.

Le blog de Erik Enfors in interlingua

05.09.2010
Iste historia es publicate previemente in le revista Panorama no 4-2004, sub le nomine”Ancora il ha homines honeste”.Tu pote audir mi lectura de iste historia in infra. Clicca sur le button in le fenestra de esnipsIsto es un historia authentic re un evento ante alcun annos in Israel. Mi sposa e io vadeva a ibi insimul con duo amicos pro celebrar mi sexantesime anniversario. Post un septimana quando nos viagiava in tote le pais nos anque voleva baniar alcun dies in le Mar Rubie in Eilat.Un die quando nos habeva jacite sur le plagia durante multe horas nos decideva vader a un café. Nos quittava nostre vestimentos sur le plagia ma naturalmente io debeva haber mi portafolio e io lo poneva in le tasca al reverso del calceones a baniar. Quando nos retornava al plagia io ipse decideva baniar un ultime vice ma mi sposa e amicos remaneva su le plagia. Io natava a foras in le aqua equipate con snorkel e cyclope reguardante le belle pisces e corallos colorose. Io anque videva duo scafandreros natante in le direction opposite al longe le fundo del mar multe metros sub me.Quando io retornava al plagia mi sposa me demandava con un surriso ironic: Ubi es tu portafolio? Alora io rememorava que io lo habeva ponite in le tasca e nunc illo esseva disparite. Naturalmente io esseva multo anxie, e post haber vidite mi confusion e horror un longe tempore, mi amicos finalmente diceva, que illes ante dece minutas habeva audite duo scafandreros camminante al longe le litore critante in anglese: "Es Erik Enfors hic?"Primarimente mi amicos esseva multo espaventate e confundite, ma fortunatemente illes respondeva post un tempore de hesitation. Le scafandreros alora demonstrava un portafolio totalmente humide que illes habeva trovate sur le fundo del mar, inter le scolios de corallos, plus que cento metros ab le litore. Pois que mi sposa poteva demonstrar su carta de identitate con le mesme nomine, Enfors, illa recipeva le portafolio e illa poteva constatar que illo ancora contineva e moneta e cartas de credito.Naturalmente illa les offereva un gratification ma illes refusava lo reciper lo e vadeva verso le parcamento.Quando io audiva isto io vadeva al parcamento pro regratiar les e de facto io les trovava ibi. Io parlava un longe tempore con illes e io poteva constatar que illes esseva studiantes universitari. Quando io de novo offereva un gratification pro haber essite tanto honeste, illes finalmente lo acceptava. Il haberea essite satis costose pro me, si io non habeva retrorecipite le portafolio, perque illo excepte moneta anque contineva e le licentia a conducer e le carta de parcamento del aeroporto in Svedia e alcun altere papiros importante.Post iste evento fortunate mi amicos me consiliava comprar billetes de lotterias a causa de mi grande fortuna quando io retornava a Svedia, e de facto io anque comprava un tal. Ma alora le Dea de Fortuna me habeva abandonate, e apparentemente illa opinava que lo que jam habeva evenite esseva plus que sufficiente pro me. Get this widget | Track details | eSnips Social DNA